أنا مش فاهم حاجة بتاتاً

أنا مش فاهم حاجة بتاتاً

طيب لو البلد مش خربانه و أنا كذاب ومدعى وابن ستين فى سبعين تقدورا طالما انتم شايفن البلد كويسه تقدروا تفهمونى إيه اللى بيحصل
وليه الكم الهائل من التناقض اللى فى كل مكان وفى كل نفسيه وفى كل حاره وزقاقو فى كل حجرة
مثلا بأى عقل اروح كل يوم الصبح اشترى جرائد وادفع قيها دم قلبى وانا عارف ان 99% من كلامها كدب فى كدب وان رئيس تحريرها لا مؤخذه كداب وابن ستين كداب وانه عنده القدره على نقد موضوع و تانى يوم يمدحه بنفس العزيمة الصحفيه و يسابق أفضل لاعب اكروبات فى العالم خاصة فى التنقل بين الحبال على ارتفاعات كبيره
يعنى نفرج عن عزام ( ده طلب الحكومه )
طبعا لقد أصبح عزام عبء علينا فلنتخلص منه ( ده كلام رئيس منصر لجريدة قوميه )
وهكذا شغال الله ينور من غير تأنيب ضمير ولا وجع قلب (ربما أزلوا ضميره فى جلسة اخويه مع فنانه شامله )

ومثلا تعالى كده اقعد واتكلم مع اى مواطن من المواطنيين جيرانك هيلعن الحكومه ويطلع عين ابوها وهيشتكى غلاء الزيت والسمنه والطماطم والمواصلات والشباشب و مصاريف العيال وحبوب الفياجرا ( حتى الصينى منها )
طيب يا حج يا مواطن – انت هتنصحه بقى – تعالى نعمل مظاهرات ونخلع الحكومه ونطلع على جتتها البلى الأزرق
تجد صاحب الشكوى – الذى كان سيكسر الدنيا من ثوانى - وهو يتنازل عن جميع حقوقه ويقول : أنا عاوز اربى العيال
طيب يا مواطن ما انت لو سكت اكتر مش هتعرف حتى تربى فرخه على السطوح بتاعكم
يا مواطن ده الجات جات وخلاص هنشحط كلنا وللأسف لن نجد من يتعطف علينا ويدينا
يا مواطن يا شريف خلاص انفض غبار النوم عن غضبتك واغضب مره من اجل الوطن الذى تنتسب إليه يا مواطن
أغضب مره عشان مصر مش كل غضبتك من أجل ماتش كوره ولا جون كان افوسيد
طيب بلاش ده
مش الشعب كله بيحب الكوره وبيتابعها وحافظ اللعيبه والحكام والجدول وبيقعد ساعات امام الشاشه الصغيرة والشاشه المشفره يشاهد ويعلق ويسب ويلعن ( وزى ما احنا عرفين ان ابراهيم سعيد أدخل متعة جديده على الملاعب )
طيب تمام يعنى بتحبوا الكوره
نفترض جدلاً ونقاشاً واستعباطاً ( عادى يعنى ) أن الحكومه منعت الكوره وقالت خلاص مينفعش محدش يلعب كوره لانها لعبه استفزازيه ( الله يرحمك يا عبد الناصر كان بيسمى الياميش سلع استفزازية ) المهم الحكومة لغت الكوره
ايه اللى ممكن يحصل ؟ فكر معلش
ولا أنا اقولك
ستجد جموع الجماهير التى قضت زهرة عمرها فى متابعة أقدام اللاعبين والان تتابع أصابعهم ستجدهم بعد الضنى وحساب الجداول والهابط والصاعد ومين جاب كام جون
ستجدهم ينفضون من حول الكورة
ولسان حالهم يقول والله الحكومه عندها حق الكورة بتضيع الوقت

مجتمع بالعقليه دى ممكن فعلا يقول لأ لحاكم ظالم
او يقول كفاية لحكومه حراميه
بصراحه

انا وجهة نظرى ان البلد خربانه والحمد لله