الأربعاء، يوليو 26، 2006

بلال فضل .. العائد من لبنان بسلامة الله

لو كنت فى زيارة أحد الأقارب او الأصدقاء او حتى المعارف او حتى ذهبت لأغراض أخرى .. الساحة مثلا على أقل تقدير وأثناء زيارتك حدثت لمضيفك امر جلل هل تهرب وتتركه يواجه المصائب وحده
طيب لو لو كاتب مناضل ومدافع عن حقوق المظلومين ( وأحسبه صادق فى هذا ) وكان فى زيارة للبنان وحدث ما حدث هل واجبه هو الهروب .. وهل من الواجب أن يترك أرض عربية مسلمة تحارب وحدها وهو بالغ عاقل رشيد يعلم أن الجهاد فى هذه اللحظة فرض عين عليه والهروب فيه من الكبائر .... لماذا تبتلى مصر بحكام هكذا وبمعارضين هكذا
لقد وصف بلال موقفه بالعار وهذا لا يكفى
يا سيدى هذا تولى يوم الزحف
هروب من معركة كنت قريب منها
ليس الوهن هو ما دفعك للهرب كما قلت أنت انه
ليس الوهن فقط
بل لأننا جميعا تحولنا لأبواق تتكلم فقط
انت تعودت على الكلام فقط
فلم تجد شعور واحد داخلك يدفعك لحمل السلاح أو حتى مجرد التواجد تحت القصف ومراسلة الصحف أو تشجيع المقاومة أو رفع الروح المعنوية
لماذا نفتقد فى مصر المعارضة الصادقة ... لو كانا صادقين لكان بلال فضل الأن هناك فى الجنوب اللبنانى
تخيلوه معاى وهو هناك يعلق على الاحداث يصاب ينال الشهادة
لكن أظن فكر فى المجد والشهرة والسيناريوهات والفنانات
واللقاءات غدا يكون فى نقابة الصحفيين يعلق على فيلمه واحد من الناس
لماذا نريد منه أن يكون واحد غير الناس
هو واحد من الناس
مصر لن تنهض إلا بواحد ليس من الناس
واحد مثل حسن نصر الله يقدم ولده على مائدة الفداء قبل أن يقدم أولاد الناس
الكل معنى بالحديث هذا
كل التيارات السياسية القوية والضعيفة الكبيرة والصغيرة
تحارب بالناس... ولا تحارب بفنسها
حتى الأخوان يدفعون بالشباب _ المحب والمنتسب _ للمظاهرات ولا يدفعون بالصفوف الإدارية القوية... لا تقول لى قياداتهم فى صفوف الأولى هذه القيادات مجرد رموز انا أتحدث عن حاملى هم الجماعة الذين يختفون عن الأعين فى المظاهرات بحجة الحفاظ على هيكل الجماعة
لم يحافظ نصر الله على ولده
ولم يحافظ بلال فضل على ماء وجهه فقد منحه الله الفرصة لكى يفعل مثلما يقول
رجع بلال (( بسلامة الله )) !!! ليتحدث عن اننا نطلب بالموت فى سبيل الله طالما ان غيرنا سيدفع الثمن
وكانت الفرصة أمامه ليدفع الثمن لكنه قرر ان يستخدم فيزا الكتابة ليدفع غيره الثمن
يارب أرزقنا من يقول ويفعل
على فكرة أنا لو كنت مكانه مش عارف كنت عملت إيه لكن انا فعلا غضبت من موقفه جدا جدا

33 تعليقات:

في 12:23 ص , Blogger SPRING يقول...

لو سيادتك عندك ذرة من الصدق ورينا شطارتك و روح جنوب لبنان و استشهد على راحتك ، و اللي عايز يسافر القمر هايسافر ، و اللي بيتكلم و خلاص هايلاقي ميت حجه عشان مايسافرش

 
في 1:05 ص , Anonymous غير معرف يقول...

يعني بلال كان هيعمل ايه يا وليد؟ واسعة تولي يوم الزحف شوية .
هيحارب مع حزب الله؟ ازاي وهوا زي أغلبنا مش بيعرف يشيل سلاح؟ ده غير ان حزب الله مش بيسمح لحد من غير كوادره بالقتال لأسباب مختلفة.

كان ممكن يفضل في بيروت ويشتغل مراسل ؟ بس الشغلة دي تفترض من الواحد انه يكون ملم بالبلد بصورة معينة ، ده غير ان بلال كاتب صحفي أكتر منه مراسل. وأكيد فيه اعداد كبيرة جدا من الناس في لبنان تقوم بالمهمة دي أحسن منه بكتير.

الطبيعي كان انه يمشي، صح؟ هيفضل عشان يعمل ايه؟ ماهو كان رايح سياحة، هيتحدى البطش الاسرائيلي ويكمل سياحته ويتجاهل الحرب؟

الحاجة الوحيدة اللي كان ممكن يعملها انه يبقى على سبيل التضامن زي كدة المثقفين المصريين اللي راحوا بيروت 1982. بس ده يفترض ان بلال له وزن مؤثر كفاية عشان يرسل رسايل تضامن.

مش عارف بدافع ليه عن بلال ، يمكن لاني حاسس اني كنت هعمل زيه لو كنت مكانه. مكنتش هستحمل جو الحرب. جربته مرة وأنا صغير وأقدر أقولك ان القصف والانفجارات وخطر الاصابة شيئ محطم للأعصاب بصورة مريعة. والطبيعي ان المدنيين يبعدوا عنه ، زي ما انت شايف كمية اللبنانيين المدنيين المهجرين.

 
في 3:48 ص , Anonymous Alaa يقول...

الفكرة اللي أنت رايح ناحيتها أنا متفق معاك فيها، لكن خطأ كبير و غرور كمان أنك تحكم على فرد و تحاسبه بالشكل ده.

كده نبقى دخلنا في مزايدات فارغة.

عموما أنا مش جاي أديك موعظة أنا جاي أقولك عن أم باسم اللي خالتي قابلتها في فلسطين، مصرية اختارت تقاوم زيها زي أي فلسطينية لم يكن لها خيار غير المقاومة

----
A woman appears from nowhere. Fortyish, poor, dressed in black, she is an Egyptian who has married a Palestinian and lived here for 25 years. Umm Basim, I have heard of her, heard that she lost her eldest son in the previous intifada and that she is in the thick of the action at the barricades every night.

Is it because of your son, I ask, that you come here?

"No. I have four more, and they are with me here. I come because this situation has to end. We can't live like this."

I ask if I may take her photo. She hesitates: "It won't appear in any Egyptian newspapers? I wouldn't want my mother to know what I'm doing. She'd worry." As I take the photo she turns to the man who brought us here: "I've seen Qassam here. Tell his father to keep him away."
----

قاسم ده ابن مروان برغوثي اللي أصر أنه ينزل يقف على الحواجز رغم أن القناصة الاسرائيلية ممكن تقرر تقتله نكاية في أبوه و اللي الناس كلها كانت بتتحايل على أبوه يمنعه من النزول لكن أبوه كان بيخجل يمنعه
المقال كامل

 
في 9:52 م , Anonymous غير معرف يقول...

اللى بيته من ازاز ميحدفش الناس بالطوب يامان ..

روح حارب وبعدين اتكلم

 
في 12:30 ص , Blogger وليد يقول...

يا رجاله

انا مكنتش فى لبنان لحظة القصف
مكنتش لحظة الحرب
مكنتش هناك

ولو كنت هناك باذن الله مش هجرى ولا هدور على عربية تهربنى
دى مش مزايدة
بس احنا اتكلمنا كتير
والحمد لله عندى صدق مع نفسى

يا اخ سبرنج

انا مش بتكلم انا نسافر
بتكلم عن معارض هارينا كلام عن الفعل
والمعارضة والتحرك
واول ما ربنا وضعه فى موقف يحتاج للحركة والصدق
هرب ب500دولار
انا مش بتكلم على شخص
انا بتكلم على عينة
عينة من معارضى النظام
ويعلم اله كم كنت أحب بلال ومتابع كل كلامه المكتوب
وعندى مجموعته القصصية التى تكتظ بالفاظ سوقيه


واخ انيميوس
فعلا عندك حق ممكن ميكنش يعرف يشيل سلاح
لكن صدقنى وجوده هناك كان هيفرق كتير معنا احنا شخصيا
انه صادق فى كلامه

علاء
حمد لله على سلامتك يا زعيم ربنا يحفظك من اهل السوء

كويس انك متفق معاى فى نقطة
وانا مش بزايد
انا بناقش نموذج يتحفنا كل اسبوع بصفحة اسمها قلمين
ولما جاء الدور عليه انه يكون قوى ويضرب مثال
معرفش
وهرب

اخ انيميوس الاخير

انا مكنتش هناك زى ما قلت
وبيتى مش من ازاز
الحمد لله انا صادق وافعل ما اقول
ومش حابب المووضع يتقلب شخصى كعادة العرب ( لامؤخذه فى اللفظ ( عادتهم الوسخه )
انا هقولها للمرة الالف
بناقش نموذج لمعارض بيتكلم وفقط

ياريت بلال فضل
يفكر ليه ربنا كتبله المكان والزمان ده

ليه ؟


و يا جماعه انا مش مفتى بس ده تولى يوم الزحف
وبلاش ندخل فى شيعى وسنى عشان ده كلام بايخ
دول يهود بيضربوا فى مسلمين
وفى بلد عربى مسلم


والى زعلان منى يكبر دماغه
ويدخل بكره فيلم واحد من الناس او فيلم وش اجرام
ويتفرج على بلال فضل السيناريست

وياريت ميتابعهوش فى الدستور
كفاية انه يتعامل على انه سينارسيت

انما معارض
ده اللى مش ممكن ابدا


علاء شكرا على ذوقك فى الحوار
ستظل محترم دوما فى نظرى

 
في 12:32 ص , Blogger وليد يقول...

مرة أخيرة
انا لا اتحدث عن السفرللحرب
لم أنتقد بلال فضل لأنه يكتب ولا يسافر للحرب
انا انتقد انه كان هناك وهرب من المواجهه


وفقط

 
في 4:19 م , Blogger شــهــروزة يقول...

دى اول مدونة ليا على الشبكة ومش عارفة اوصلها للناس ازاى او تنضم لموسوعة الشامل للمدونات العربية لو ممكن تساعدنى وتقول لى يبقا ليك جزيل الشكرhttp://shahzad12.blogspot.com/

 
في 5:34 م , Blogger موظف مطحون يقول...

أخ وليد، أنا معاك في بعض ما قلت، تولي يوم الزحف، انا مش مفتي! ولا انت كمان! صح؟

موقفه السياسي من العملية، المنحازة للناظرين بين اقدامهم، اه، هو فعلا غلطان مليون في المية انه بيردد كلام من غير ما يفهمه، مثلا مثلا، ان نفس العملية عملها حزب الله من غير ما تتدمر لبنان قبل كده، ايه الفرق؟ الفرق الرد السافل من اسرائيل، يعني مش حزب الله هو الغلطان، ده ليه أسير عدى الاربعين دلوقتي، أسروه لما كان عنده 16 سنة، اسمه سمير القنطار، للي ما يعرفوش، نهايته، عجبني بلال فضل لما كان بيعارض و بيقول كلمة الحق، و ما عجبنيش في لبنان و رأيه في الأحداث هناك تماما البتة! الله يسامحه، و يا سيدي مين قال اننا ما بنعرفش نمسك سلاح؟ بنعرف بس انت في المظاهرة بيحاوطك 100 عسكري و انت لوحدك، شوف بقى لو قلتلهم طالع لبنان اجاهد هيعملوا ف أهلك ايه!؟

 
في 4:59 م , Blogger ادم المصري يقول...

وانت بقي عملت ايه ؟

 
في 7:08 ص , Anonymous بلال فضل يقول...

بلال فضل يحييك أيها المناضل الكبير على صفحات الإنترنت وتحت ظلال التكييف.. على أي حال أشكرك على كلامك الراقي المهذب.. لكن على أي حال أتحداك إذا كنت رجلا أن تذهب إلى بيروت الآن.. وأنا متكفل بتكاليف سفرك وبإدخالك إلى لبنان..لكي نرى إقدامك وعزيمتك.. وهذا تحدي أمام الكل.. ياسيدي أنت تردد كلاما لاتعرف عنه شيئا.. اولا الفرار من الزحف يكون للمقاتل الموجود في المعركة وليس للمدني الذي لايشارك في القتال.. ثانيا لو كنت قد قرأت ماكتبته لعرفت أنني كنت بصحبة زوجتي الحامل وكان من واجبي الشرعي تأمينها وإعادتها إلى مصر.. ولو كنت لوحدي لما عدت ليس بسبب أمثالك من المزايدين وإنما لأني أؤمن بقضية لبنان وأعتقد أن اللبنانيين يشكرونني أكثر منك على ماكتبته.. واسأل صحيفة الشرق اللبنانية التي أعادت نشر ماكتبته.. والمذيع عمرو أديب الذي أعتبر شهادتي سوء حظ لإسرائيل أنني كنت هناك لأروي شهادتي.. صحيح أن وصفه أكبر مني بكثير لكن أنا أقول لك ماقاله واسأل لو أحببت..
كنت أتمنى أن تستغل هذه المساحة في التفكير في دعم المقاومة اللبنانية والتضامن مع المدنيين بدلا من أن تشغل الناس بهذه التفاهات والمزايدات وتشوه في سيرة الناس وأنت تدعي حبهم
هي فعلا خربانة ياجدعان.. عندما يكون هناك أناس ليسوا على مستوى مسئولية التدوين والكتابة..
على أي حال إذا كنت قد توليت يوم الزحف كما قلت فلم أتول أبدا في زحف الحرية في مصر.. فماذا فعلت أنت أيها البق؟
شكرا لك

 
في 6:21 م , Blogger خالد كامل يقول...

المفروض ان احنا نتحد مش وانا مع فكرت الصفر للبنان والمقاومه المسلح

 
في 10:26 م , Anonymous غير معرف يقول...

عجبا علينا

 
في 3:05 م , Blogger وليد يقول...

أزال أحد مشرفي المدونة هذا التعليق.

 
في 3:15 م , Blogger وليد يقول...

موظف مطحون
أنا مش مفتى
ولن أكون
وأنا أوضحت فكرتى

أدم المصرى
وندخل سويا فى عادة المصريين
وألقى الكره فى ملعبك
وماذا فعلت أنت ؟
يا جماعة انا وجهة نظرى واضحة
ولم أزايد على أحد
فقط حبيت أوضح أن الكثير من معارضى مصر زى حكومة مصر وفقط
مع كامل الأحترام للجميع


الاستاذ بلال فضل
هى فعلا خربانة ودى وجهة نظرى
الكل خربان

المهم أنا سعيد جدا جدا أنك شرفت مدونتى المزايدة التى لا استغلها فى شئ نافع
وعلى فكرة أنا قرات ما كتبته حضرتك من أول الموضوع اللى اتنشر فى المصرى اليوم وحتى مقالاتك فى الدستور
قرءتها كويس جدا
واسمح لى انا اقبل دعوتك للذهاب هناك
وانت معى بالطبع
فأظنك أطمئننت على زوجتك
منتظر وسيلة اتصال بحضرتك وتجهيز انفسنا
ليس بالضرورة للقتال
لكن للتضامن وطالما الموضوع على نفقتك فانا موافق

ولما نتقابل هعرفك بنفسى لتعرف هل انا مزايد أم فعلا لى دور فى هذه الحياة
وبالضرورة يجب ان تعرف اننى لا امتلك تكيف ولا سيارة ولا اى من متاع الدنيا الا لو اعتبرنا شقة فى حى شعبى قح هو متاع وليس عقاب

محبتش ارد على كلامك بنفس الاسلوب لان ميصحش يعنى نبقى زى خالتى فرنسا ونردح لبعض

منتظرك سيدى

 
في 3:17 م , Blogger وليد يقول...

خالد كامل
انا لم ابغ اى فرقة ولو تابعت مدونتى انت والسيد بلال فضل لن تجد موضوع يدعم الفرقة

واظن ان دعوة السيد بلال فضل للسفر لبنان مفتوحة للجميع وليس لى انا فقط

الاخ انيميوس
فعلا عجبا علينا جميعا

 
في 3:25 م , Blogger وليد يقول...

استاذ بلال
معلش استفسار صغير

يعنى ايه البق ؟
هل ده حشرة الفراش
انا لا اضحك والله

بكلمك بجد
هل هى سب
؟؟


وتانى مرة بجد بجد انا سعيد ان حضرتك منور المدونة بتاعتى

ولو انا سئ كما تظن كان من السهل على أنى ابعت المقال ده لروزاليوسف مثلا

لكن بفضل الله انا احترمك كصحفى جدا
وحبيت فقط اوضح خطا انت وقعت فيه
زى ما حضرتك كل اسبوع بتوضح اخطاء مبارك ونجله ووزرائه وصحفييه

شكرا لك على تواصلك

 
في 11:40 م , Blogger عبدالله مفتاح يقول...

يا حاج وليد جهاد ايه ومقاومة ايه اللي انت عايز بلال فضل يعملها ده راجل اخره يكلم زيه زي اشباه الرجال اللي طلعوا عملوا فيها وطنييين وهما من اكبر المفسدين في الارض

لما نلاقي عادل امام مكشر وماسكلي شمعه وعامل فيها زعلان اوي

عادل امام عايز يعيش في دور البطولة وليه لا مهي الساحه مفيهاش بطل
عادل امام اللي عمل رساله الى الوالي وطول الفيلم عمال يمارس الاعمال القبيحه التي يعاقب عليها القانون
وطبعا محدش بيحاسبه
عادل امام اللي عمل افلام نالت من المبادئ والقيم الكثير عامل فيها عم المصلح

ولا الخايب التاني اللي اسمه حسين فهمي زعلان اوي على لبنان وبيقول مش بنهتم الا بالفتاوى والهشك بالشك

لانه جاهل وضع الفتاوى والهشك بشك في سلة واحده ونسي مغامراته الساقطه في الافلام مع ميرفت امين ونجلاء فتحي وغيرهم

مش غريب ابدا تصرف بلال فضل

ده راجل غاوي شهرة بيشتم الريس وحاشيته وكل سنه وانت طيب مقاومة ايه وبتاع ايه بلا خيبه

دول وش ذلك

مع احترامي ليه ككاتب الا انه بيزودها كتير في كتاباته

وابقى قابلني لو سفرك

 
في 8:48 ص , Anonymous بلال فضل يقول...

يبدو لي أنك فرحت للغاية بأنك افتعلت مشكلة معي.. ربما تتصور أن هذه هي الشطارة والجدعنة.. تريد أن تصل الى قناعة أنه لايوجد فرق بين الحكومة والمعارضة.. أهنئك ألف مبروك أنت مستريح الآن ووجدت مبررا لسلبيتك وعدميتك.. تقول أني ضاق صدري بنقدك.. هل تسمي ماقلته عني نقدا.. هل استخدام ألفاظ مثل الهارب والفار وغيرها نقدا.. أم أنها شتائم.. ثم قل لي بماذا شتمتك أنا.. هل كلمة البق شتيمة.. انت اعتبرتها كلمة شتيمة بينما هي كلمة عامية تطلق على من يتكلم دون أن يعمل.. أنت تدعي أنك شجاع وقلبك على لبنان.. وأنا لازلت عند كلمتي.. دعوتك للسفر فربطت نفسك بي.. أنا أقول لك أنا انتظر منك ايميلا تخبرني فيه أنك حصلت على الفيزة من السفارة اللبنانية وأنا مستعد لكي تسافر على حسابي ولا شأن لك بي طالما تراني هاربا وفأرا.. أم أنك تخفي عجزك وسلبيتك بهذا الربط الغريب بينك وبيني.. أنا ايميلي معروف لكل من يقرأ الدستور.. أنتظر منك ايميلا فور حصولك على الفيزا وأقسم بالله عزوجل أنني مستعد لكي تسافر على حسابي لكي تثبت للناس شجاعتك وجدعنتك..خاصة أنك كما قلت لاتملك تكييفا تخاف عليه.. وأنا أحييك على هذا.. في انتظار ايميلك في أسرع وقت..
لست بحاجة لأن أقول لك كيف أؤدي واجبي نحو لبنان.. فهذا أمر يعرفه من يحبني ومن أهتم لرأيه.. لكنني بجد كنت أتمنى أن تعرف أولا معنى الفرار من الزحف الذي اتهمتني به وهي تهمة شنيعة وقاسية لو كنت تعرف أحكامها شرعا لما أطلقتها جزافا هكذا..
لست مستعدا لكي أدخل في مهاترات مع بعض الأًصدقاء هنا فمن حقهم أن يكرهوني كيفما شاؤوا.. قضيتي كانت معك أنت يامن تدعي أنك تحبني وأنني شرفت منتداك بينما كل ماتكتبه عكس هذا.. كنت أتمنى أن تلتقط خيطا من كلامي عن لبنان لكي نفكر ماذا يمكن أن نفعل من أجل لبنان.. وكيف يمكن أن نقضي وقتنا في أي شيئ يدعم أهله ومقاومته.. لكنك تركت كل هذا وقررت أن توجه سلاحك لي أنا.. هنيئا لك عمق تفكيرك.. وهنيئا لك تطوير الأمر لتحوله إلى بكائية تستخلص منها أن ماعادش في فايدة في الدنيا وأننا كذابون ومستبدون كالحكومة تماما بينما أنت تعلم وإن كنت لاتعلم فلتعلم لاأوفر فرصة للحوار المتحضر مع من يختلف معي دون شتائم أو اتهامات أو تفتيش في الضمائر
فعلا شيئ محزن والله.. ولايملك الإنسان إلا أن يقول حسبنا الله ونعم الوكيل.. على أي حال أنا لازلت عند عرضي ومنتظر ردك فور أن تستخرج الفيزا..وأتمنى أن تفهم ماأقصده من كلامي لك بأننا نحتاج إلى ماهو أكثر من المزايدات والمهاترات التي كنت أتمنى أن تشغل نفسك بها أنت وأصدقائك..
بالمناسبة الأخ الذي يصفني بأني أهاجم الرئيس للشهرة لماذا لاتهاجمه أنت أيضا وتحصل على نصيبك من الشهرة
أما وصفك لي بأنني من أشباه الرجال بينما أنت تدعي أنك متدين وتخاف الله فأنا لن أرد عليك أبدا بل سأشكوك إلى الله وأسأله أن يقتص لي منك يوم الدين ولعلك تعرف أن ماقلته يستوجب القصاص يوم الدين
شكرا جزيلا وفي انتظار ردك ياصديقي على الايميل..

 
في 6:10 م , Blogger وليد يقول...

أزال أحد مشرفي المدونة هذا التعليق.

 
في 6:17 م , Blogger وليد يقول...

فرحت.... ليه ان شاء الله
انا فاضيلك ؟
اقسم بالله انا تركت عملى ودخلت حتى ارد عليك وانا فى حاجة ماسه للساعة التى اقضيها فى السيبر لأرد على معاليك

فرحت ليه لامؤخذه

ولا اريد أن أصل لقناعة أن الحكومة مثل المعارضة فأنت أول من قال ذلك على المعارضة الورقية
الأن أنضممت انت للمعارضة الورقية تلك
الكتابة وفقط

وبخصوص الألفاظ التى أستخدمتها فأنت يا سيدى المهذب صاحب قاموس سوقى فى الرد على الجميع فى مقالاتك وافلامك ومجموعتك القصصية
وألفاظى تتضائل من الخجل والحياء أمام اسلوبك المعروف والمشهور

وبخصوص السفر أنا جاد وجاهز وتحدثت مع زوجتى وشريكى فى العمل و ربط سفرى بك لأننى يا سيدى افترض فيك الصدق وانت قلت انك رجعت من أجل الأطمئنان على زوجتك
وها أنت فعلت
فتعالى معاى لكى يزداد حظ اسرائيل سوءا كما قال و افتى عماد اديب
تعود أنت وأذهب أنا معك لكى تكتب من هناك ونتضامن من هناك
وبخصوص الفيزا أنت قلت أن الامر كله على نفقتك وانا حتى استخرج جواز السفر احتاج لمال لا امتلكه ( تخيل انى لا املك الان مال لاستخراج الجواز )فلابد من ان التقيك لتمنحنى حضرتك مالا من ريع افلامك الهادفة المحترمة لاسافر بها معك
كما قلت أنت أيضا أنك متكفل بأدخالى بيروت وهل الفيزا بعيدة عنك لهذه الدرجة أيها البق ؟( طالما مش شتيمة بقى )

وارجوا ان تكون على قدر المسؤلية لاننى جاد ولا أمزح
كنت اتمنى أن تدخل وترد معتذرا عن موقف هروبك لكن للأسف ثقافة الأعتذار ام استك لا تأتيك إلا بعد سنوات كما فعلت فى بداية الدستور الجديدة
هل تذكر؟
هل تدرك أننى أتابعك جيدا

أنت كنت تريد منا ان نغفر لك هروبك ونفعل ما اعتادنا عليه
نسب النظام الجبان الذى لا يقدر على فعل أى حركة للتضامن
ونلعن اليوم الذى ولدنا فيه
ونمدح لك شجاعتك التى جعلتك تكتب وتكتب وتكتب دون خوف
ونتناسى ان صاحب قلمين هو صاحب الفيلم الداعر ( صايع بحر ) الذى أظهر الشباب وكأنه ديوث يقف على باب كابينة الشاطئ حتى ينتهى الزناة من فعلتهم
ولست ناقد سينمائى لكن نصيحتى لك يا من استحضرت الأخرة لكى تقتص منى او ممن انتقدك هنا
هل تكون أفلامك تلك فى ميزان حسناتك يوم القيامة أيها البق ؟
هل يكون فيلم حاحا وتفاحة فى ميزان حسناتك ؟

سيدى الكريم
بارك الله لك فى أموالك التى تأتيك من عرق أفخاذ مروى وأخواتها ودعنا وشاننا
بإذن الله سوف أسافر من مالى وسوف أتصل بك من هناك
من لبنان أو من غيرها
أو ربما يشاء الله فأتصل بك من القاهرة حين تأتينا جيوش اليهود أو الأمريكان أيهما أقرب

يا عم بلال ركز فى الأفلام وسيبك من المعارضة ومعركة الحرية والكلام الكبير ده
أنت لو استحبست 6 شهور ممكن تطلع واحد تانى خالص
وبلاش تفتش فى نفسى انا لم أفتش فى نفسك أنا كملتك فى موقف واضح
وقلتلك لما هقابلك هعرفك بنفسى عشان تعرف مين اللى بيدفع تمن معركة الحرية
؟
مين اللى بياخد فى دماغه بجد
مين اللى بيتسجن وبيتبهدل ؟
ومين بيناضل على الورق

؟

زى ما قلت لك ركز أنت فى السينما و فنانتها
وسيبك بالله عليك من المعارضة
والقيم ويوم القيامة !!!!
أنت مفيش فيلم ليك يا مولانا إلا وفيه عرى والفاظ خارجة

يا عمنا كل بيت فى مصر هيجى يوم القيامة ويقلك حسبى الله ونعم الوكيل

متزعلش من كلامى

كل سنه وأنت طيب ومبروك عليك أفلام الصيف ده
وفلوسها الحلال اللى هتسفرنى بيها يا عم المناضل


هقوم ألحق شغلى... وعلى فكرة هشترى الدستور برضه بس مضطر أنى أبطل قراءه ليك
خلاص بقى أحنا دفنينه سوى

 
في 2:11 م , Blogger layal يقول...

اسفه علي التعليق المتأخر ولكن تذكرت بكلامك رجل ترك بلده بهذه الايام وذهب ليبقاي مع زوجته اللبنانيه بالبنان لانها الاخرى رفضه العوده لبلاده تاركتا ورائها اهلها
سمعت بأناس فضلوا البقاء هناك ومواجهة الموقف ليس كعسكر ولكن تضامنا مع اهل البلد
بالنسبه لمشاركة القائد بالمعركه
اقول ليتنا نملك اسكندر مقدوني -فلاسكندر كما قرأت دائما كان بمقدمة جيوشه
مدونه متميزه -واعجبني جدا بنر(مصر مش كده )
بالتوفيق ان شاء الله

 
في 11:16 ص , Blogger Ahmed ElSharawy يقول...

ممكن كان يكتب من هناك أو من هنا مش هي دي المشكله

ما أحسست به أنه مش عاجبه حزب الله و مش عاجبه اللي عاملوه

 
في 9:13 م , Anonymous soha يقول...

و الله العظيم انا مش فاهمه انتوا عايزيين ايه بالظبط هو حد قالك ان بلال فضل كان جندي ولا مقاتل عشان يكون هرب من الجهاد و الكلام الكبير الي انت كاتبه, ده مواطن مصري رايح اجازه مع عيلته و قامت حرب فرجع بلده معملش حاجه غريبه ولا ارتكب جريمه عمل الي عمله كتـيـــــــــــــــر من اللبنانيين الي سابوا البلد و سابوا اماكن الضرب لمكان امان و محدش يقدر يلومهم , و الراجل عمل الي عليه من الادلاء بشهادته القيمه و بعدان انت حولت الموضوع شخصي ليه ؟ ايه دخل افلامه و رأيك فيها و انها حلال ولا حرام في الموضوع و في الاخر حقولك الي ايده في الميه مش زي الي ايده في النار اما عن انه بيتكلم بس فحتي لو كان كلامك صح فده مش عيب ولا حاجه بسيطه و سهله زي ما انت بتصورها ده جزء من تشكيل الوعي العام و دي اول خطوات التغيير من وجهه نظري و اعتقد ان كلام بلال فضل و غيره بيصحي ناس كتير و بيدل علي شجاعه صاحبه لان كلام زي الي بيكتبه بلال فضل ممكن اوي يوديه في ستين داهيه و زي ما فهمت ان بلال مسؤول عن أسره لكن مقلش يلا نفسي و سكت لا اتكلم و قال كل الي نفسه يقوله و الي نفس ناس تانيه كتيــــــر تقوله لكن معندهاش شاجعته و حمدلله علي سلامتك يا استاذ بلال

 
في 10:47 م , Blogger وليد يقول...

سها

منورنا بجد

اقرئى بهدوء هتلاقى رد على كل اتهاماتك

 
في 12:36 م , Anonymous غير معرف يقول...

أزال أحد مشرفي المدونة هذا التعليق.

 
في 6:07 م , Anonymous غير معرف يقول...

بسم الله الرحمن الرحيم اخوتى واخواتى كلنا ابقاق

 
في 6:20 ص , Anonymous غير معرف يقول...

Keep up the good work Free illistrated sex stories http://www.interior-designer-0.info/buildasofatables.html prices graphic cards 32 mb Mike murphy baseball Allergic reactions to zoloft

 
في 3:33 ص , Anonymous غير معرف يقول...

That's a great story. Waiting for more. New hampshire business insurance info on valtrex tits ass cunt spank enema water bed http://www.play-keno-5.info Nissan altima indicator light codes Double bonus poker cheap air flights travel tips Black jack forum Holiday acres camping hoveround electric wheelchairs Fort collins contact lenses Healthy contact lens Business health insurance kentucky Entertainment and sports appellate court

 
في 1:34 م , Anonymous zaza2zizi@yahoo.com يقول...

الأخ وليد مش فاهمة يعنى ايه تحول موضوع عادى لحاجة شخصية وتمسك كرباج وتسلخ صاحبه كمان ، تقدر تقول لى اللبنانيين عملوا لبلدهم ايه معظمهم سافروا باريس والقاهرة، واضح ان في حالة حقد شديد جدا على بلال وكانه المفروض يبقى عبد الحميد الديب نمرة 2 قول لى انت بتناضل ازاى فى مصر وورينى شطارتك والا انت من حزب روزا وشغال معاهم من تحت لتحت وواضح كمان انك فخور اوى انك قدرت تجرجر بلال عشان يرد عليك مع انك لاتستحق يكفى الحقد الذى يقطر من كلماتك
مدام منى زكريا

 
في 3:18 م , Blogger وليد يقول...

اخت مدام منى زكريا
انا برضه مش فاهم تعليقك والله
هو حضرتك مباحث؟

طب حضرتك من وزارة التموين ؟

اصل انا مش من روز ومش بحبها من ايام عادل حمودة لما كان اخونا بلال بيشتغل فيها

وانا يا فندم شريك فى دار نشر مغلقة حاليا لاننا نحاكم امام محكمة عسكرية فى قضية غير قضية الاخوان
عشان اسمه ايه ده النضال
واحب اعرفك يا اخت مدام منى زكريا
ان الموضوع ده بقاله سنه
والظاهر ان حضرتك كنتى نايمة وصحيتى متاخر
على العموم
لو متحبستش فى القضية هتلاقينى على طول هنا
انا بستمتع بقراءة هذه التعليقات النسوية المفلطحة

 
في 1:46 ص , Anonymous غير معرف يقول...

انت نهيت الموضوع وقلت انك لو مكانه كنت ممكن تتصرف زيه..دى الخلاصة..وعلى فكرة الكتابة مش سهلة لان بلال بيكتب وهو عارف انه ممكن تانى يوم يبقى فى ابو زعبل..وكمان الحرب دى كان ليها ظروف خاصة..واعتقد ان بلال يستمر فى الكتابة افضل لاننا محتاجين برضه للى يكتب بدون خوف
تقديرى واحترامى
http://elmashrabiah.maktoobblog.com/

 
في 10:21 ص , Anonymous غير معرف يقول...

بسم الله الرحمن الرحيم

الاخوه الاعزاء
انا حاسس ان 90% من اللى اتكلموا سفسطائيين عاوزين يتكلموا بس من ورا الاقنعه

بمعنى ادق كل واحد عامل نفسه بارم ديله من ورا الكى بورد
خصوصا الاخ العزيز المهذب المحترم الاستاذ وليد
اللى حاسس انه متحامل على اى حد مش موافقه رايه
واللى حاسس كمان انه متحامل على بلال بطريقه غريبه
بس برضه بلال مش فوق مستوى النقد
كمان بلال معجبنيش انه دخل فتحدى مع وليد والفيزا والتذكره على حسابى
موصلتش لكده يا بلال
احنا مش اطفال فالشارع علشان نتراهن
الوضع وما فيه من وجهه نظرى الشخصيه المحدوده
ان الراجل رجع بلده
مش هرب
ولا فار
ولا كلام مطرقع زى اللى قاله وليد
معلش لبنان على عيننا وعلى راس اللى خلفونا
بس معلش
اذا كان اهل لبنان نفسهم 75% منهم ماليين بلاد الله من البرازيل لليابان والصين وكلهم ماشاء الله مالتي ملياديرات
فالعالم كله
مسمعناش حد قال ان حد لبنانى اتبرع بطياره ولا بصاروخ ولا حتى بمسدس لعبه؟؟؟؟
مش معنى كده اننا ضد لبنان او حزب الله او السيد/حسن نصر الله
بالععكس
احنا معاهم لبقا وقالبا
بس وجودنا معاهم هايضرهم مش هايفيدهم
لان لو حد غير لبنانى اتمسك
المقاومه اللبنانيه هاتفقد مصداقيتها
وهايتقال ان اللى بيحاربوا اسرائيل من لبنان مجموعه من المرتزقه اللى بيحاربوا بالاجر
اللى علينا دلوقتى اننا ندعولهم بالنصر ونساعد باللى نقدر عليه
والاهم من كده
اننا ما نشجعش الفرقه ونشعل الخلافات بيننا وبين بعض
وان نقدنا لبعض يبقى نقد هادف بناء مش هدام
الكلام ليك استاذ وليد
وبلاش نحجر على راى الاخر
بس بلياقه
وبلاش نتعصب ونكبر الموضوع ونخليه تار بيننا وبين بعض
ماشى يا عم بلال
اتمنى لكل الامه الاسلاميه والعربيه دوام النصر والتوفيق والله ولى التوفيق


شريف المصرى
shereef_elmasri@hotmail.com

 
في 11:30 م , Anonymous غير معرف يقول...

ياعم جهاد ايه ... هو القلم م يعتبر سلاح ... احنا مش في زمن الجهاد احنا في زمن الدول القومية مش في زمن الخلافة ... حرام عليكو بقةعايزين تزودوها خراب اكتر ماهي

 

إرسال تعليق

الاشتراك في تعليقات الرسالة [Atom]

روابط هذه الرسالة:

إنشاء رابط

<< الصفحة الرئيسية