الأحد، يوليو ٣١، ٢٠٠٥

الفرح فرحنا والدم دمنا واللى يحبنا ميقلش كفاية

إيه يا ريس ده إزاى تخلى شوية عيال يبوظوا الفرح ويخبطوا دماغهم فى الحيطة ويعملولك محضر اعتداء والفضائيات المأجوره تصورهم وهما بيضربوا وهما رافعين ايديهم
لا لا لا يا ريس
الفرح فرحنا وبأذن الله فرحك هيتم ومحدش هيقدر يبوظه
والمهم تمسك أعصابك العيال دول همهم الوحيد إنهم يبوظوا فرحك فلازم نمسك أعصابنا ونكبر دكاغنا .... إياه يعنى لما يعايروك أنك عريس وعندك 80 سنه وخلاص صحتك على قدك وأن العلقه بتاعة طابا وشرم الشيخ هدت حيلك عادى يا ريس
مش مهم اتحملهم وطول بالك انت الكل فى الكل رغم حقد الحاقدين
يا ريس بالله عليك كلم الاخوه قريبك فى الامن المركزى وفهمهم أن العيال دى بتتصلبط يعنى مش حمل قفاه ولا قلم ولا شلوت من اللى وصى عليهم العادلى فى امر اعتقاله يا ريسنا لازم نتحمل عشان الامريكان يصدقوا انك اتغيرت وبقيت ديمقراطى
مش عاوزينهم يفهموا ان دموى وفقط
ماشى
خلاص
واحنا بقى اخوات وهقلك كلمتين عشان ربنا يرحمنا
لازم تعرف يا ريس
ان ربنا لسه موجود ممتش ومش هيموت لان حى لا يموت
يعنى زى ما ذل صدام وخرجه من الحفره واخده من ملكه وجبروته وفضحه وجرسه وذله وصوره وهو بيغسل لا مؤخذه الحتيتين الجيل بتوعه الابيض فى ابيض وزى ما قتل عياله وخلاه يشوفهم جثث زى ما كان بيعمل فى عيال الناس
اكيد ربنا مش هيسيبك وهتشوف عيالك بيتعمل فيهم زى ما عملت فى ولاد الناس
وبعدين يا ريس
لو خلاص عندكم طاقة زياده ورجاله قوى
روحوا اتشتطروا على العيال بتوع شرم الشيخ اللى ضربونا على قفنا مرة واتنين وتلاته وطول ما الفرح شغال ولسه
ليه ؟
ليه يا عمنا ؟
ليه يا كبيرنا ؟
عشان حضرتك يا ريس مش فاضى لامن البلد انت عاوز تركبنا 6 سنين كمان ركوب تركى على نظام أفندينا !!!!
يا ريسنا أن الله يملى للظالم حتى أذا اخذه لم يفلته
ولا تحسبن الله غافلا عن ظلمك وعدوانك وجبروتك بل يؤخرك ليوم تشخص فيه الابصار
كل ضربه تألم منها اى شاب فى القاهره و فى السجون وفى مقار امن الدوله بتقربك من عقاب الله
كل نقطة دم بتنزف من شاب كرهك ومش عاوزك صدقنى هتكون لعنة عليك وانت واقف بلبوص امام الله يحاسبك
يا ريس
حرام حرام
وأن موعدكم الحفرة اليس الحفرة قريبه

الجمعة، يوليو ٢٩، ٢٠٠٥

أمسك مسئول بيهرتل

جريدة المصرى اليوم (( عدد412 الخميس 28/7 )) التى أحترمها جداً حاورت صفوت النحاس وهو لمن لا يعرف رئيس الجهاز المركزى للتنظيم والإدارة
المهم طبعا كلامه خارج نطاق الخدمه كله
ما لفت نظرى واستفزنى جداً وأشعرنى ان مهما كبر المسؤل فى مصر فهو مجرد تابع ذليل لنظام فقد عقله واحترامه مهما كان المسؤل محترم وعالم و أستاذ .
وإليكم الأسئلة التى أوقفتنى وبالطبع إجابتها
ما رأيك فى الحركات السياسية على الساحة وما تفعله من معارضة للنظام مثل كفاية والتحالف الوطنى والإخوان ؟
-لكها ليست لها جذور شعبية وهى رؤية لبعض المثقفين لا تساندها قواعد شعبية ونحن نحترم الرؤية والتعبير عنها بشكل مقبول لكن نرفض أن يفرض أحد رؤيته على الأخريين لكن يمكن التحاور معهم ودراسة أرائهم
تعليق من عندى
* الرجل لا يفهم الفارق بين الأخوان الذى يزيد عددهم عن عدد اعضاء الحزب الوطنى ولا احد يشكك فى شعبيتهم إلا اعمى
* الرجل تبنى وجهة نظر الحزب ونسى أنه مسؤل محايد مرتبط بالدولة وليس بالحكومة
* الرجل نسى نفسه وتكلم باسم وزير الداخليه وطلب التعبير عن وجهة النظر بأشكال مقبوله
هل ترى أن بعض هذه الحركات لها أتصالات مع الخارج ؟
- مصربلدنا وكلنا حريصيين عليها وهى حجر الزاوية للمنطقة والخطوات التى اتخذها الرئيس من تعديل المادة76 من الدستور لتعديل انتخاب رئيس الجمهورية والأحزاب وممارسة الحياة السياسية وإلغاء محاكم أمن الدولة الإستثنائية والجنسية المصرية لأبناء المصرية المتزوجة من أجنبى كل ذلك تم فى خلال 12 شهراً وكلها خطوات على الطريق وستتبعها خطوات أخرى للديمقراطية والإصلاح الإجتماعى
تعليق من عندى
* الرجل كما يبدوا باغته السؤال لأنه خارج المنهج لذلك أجاب مما يحفظ حتى لو بدا للأغبياء مثلى أن الإجابة ليس لها أدنى علاقة بالسؤال
* الرجل ربما أنتهز الفرصة ليقول كلمتين زنيقنه وحتى يتقرب من الدوائر العليا والمثلثات السفلى
* الرجل بيهرتل بمعنى انه ربما يكون نسى عقله فى المنزل لحظة الحوار
* الرجل أثبت ان المسؤل فى مصر مدخشش حتى لو كان دكتور
ملاحظات عامه على الحوار
كفاية ربنا ياخدكم يا كذابين مش عيب شحط زيك يكذب

الثلاثاء، يوليو ٢٦، ٢٠٠٥

الصحافه فين الأمن المصرى أهو !!!!

القاهرة تتهم 6 باكستانين بالضلوع فى عمليات شرم الشيخ
القاهرة تنشر صور 50 مشتبه بهم ( كويس انهم مش 50 مليون )
القاهره تنفى انها اتهمت الباكستانين
القاهره تحاصر قريتين للبدو لانهم يحمون الجناة
القاهرة تشتبك مع البدو
القاهرة
حتى الصباح متوتره

الاثنين، يوليو ٢٥، ٢٠٠٥

مشتبة فيك

تفجيرات لندن أعتقل على أثرها حوالى 3 أشخاص أو اكثر قليلاً
تفجيرات مصر أعتقال 93 مشتبه بهم
فارق ضخمن بيننا وبينهم
بين الأمن الذى يخطط ويفكر ويستخدم التكنولوجيا ويحدد ويراقب
وبين من يبطش ويعتقل بالجملة بدون وعى
يوم ما حدثت جريمة قتل فى حينا شاب قتل فى شارع مظلم
المهم ضابط المباحث
أعتقل أكثر من 250 شاب وهات يا ضرب وتعذيب الى أن اعترف البعض بما حدث
منهم كان شاب لسانه تقيل جدا يعنى بيتكلم لكن ببطىء ولما شاف الدم والقتل لسانه ربط خالص
خالص
المهم الضابط يضرب فى الواد أتكلم يا بن الكلب
والواد خلصان خالص
إلى أن استدعوا أبوه الذى أقر بأن أبنه قريب للخرس
المهم قابلت الولد بعد أن أفرجوا عنه من القسم
سألته حصل أيه
قال : أنا أضربت ضرب يا أستاذ

الأحد، يوليو ٢٤، ٢٠٠٥

الإدارة غير مسئولة عن المفقودات

الإدارة غير مسئولة عن المفقودات


كنت اليوم فى الشاطئ فى ميامى.. لست فى مارينا ولا شرم الشيخ ولا الغردقة
ميامى
شاطئ مصرى محلى متواضع

لفت نظرى لافتة مكتوبة عليها

الإدارة غير مسئولة عن المفقودات

و أسفل منها فتى يحتضن فتاة وكأنهما فى غرفة مظلمة
بعد خطوت شاهدت فتاة ليل ليس لأحد ان ينهرنى ويقول أننى ادعى لا
ملامحها ملابسها حركاتها السيجارة فى يديها خلعها لملابسها .. خلعها لملابس شريكها الذى كان خجول بعض الشئ بالمقارنة بها ... الحديث بينهما ... هى لاشك فتاة ليل
تذكرت اللافتة

الإدارة غير مسئولة عن المفقودات


جلست حيث جلس أقاربى فى زاوية بعيدة عن التجمعات ياتى كل حين المصور ومعه الزبون يجلس أو بالأحرى تجلس الزبون بعد تسريح شعرها على الصخور فى أوضاع أشبه بالفنانات والمصور يأمرها بأن تغير من وضعها حتى تطلع الصوره حلوه
وتذكرت

الإدارة غير مسئولة عن المفقودات


ثم عائلة كبيرة تخلع الفتيات منهن ملابسها ( العبايات) ويظهرن بالبادى والاستريتش حتى يلطقن الصور مع من يبدو أنهم خطيباتهن فى أوضاع أشبة بالفنانات أيضا حوالى عشرة صور ثم أرتدين العبايات من جديد ويا دار مدخلك شر

فانتابتنى الصورة من جديد

الإدارة غير مسئولة عن المفقودات


سيدات بلا حشمة ولا حياء
فتيات يلعبن مع الشباب
مرح ولعب وجد
وحب
ولا عبد الحليم وسعاد حسنى

الإدارة غير مسئولة عن المفقودات


نعم طالما ان
الإدارة غير مسئولة عن المفقودات


من هو اذا المسؤل

الأحد، يوليو ١٧، ٢٠٠٥

ثم لا تتركنا وحدنا

يارب..... قلنا فى وجه الظالم قول الحق... لم نهابه....
يارب خرجنا فى الشارع.. نقف أمام قصره نهتف بالحق
يارب ضعفاء نحن فقونا
يارب تمادى الظالمون فى غيهم فأزحهم الى غير رجعة
يارب سقط منا واحد تلو واحد تلو أخر ولم نمل
هتكوا أعرضا نسائنا.... وليس بيننا محمداً يوعدنا الجنة.. لكننا سمعنا صوته من بعيد(( صبراً ال ياسر إن موعدكم الجنة )) فصبرنا
يارب تجبر الفرعون فى ملكك ... نسى أنه عبد, فذكره يارب بقوتك وأرنا فيه جبروتك
يارب فسق الفاسقون بأرضك... فلعناهم ووقفنا فى وجوههم.. فكنا معنا ولا تكن علينا
يارب باعوا من يجاهدون فى سبيلك... فانصر عبادك
يارب سرقوا أقواتنا.... وأموالنا.... .. وسمموا اجسادنا.... فكن معنا
نحن لم نصمت فى الشارع وقفنا وكتبنا وهتفنا... وضربنا
قلنا قول الحق فى وجه سلطان جائر
جائرون هم يارب
جائرون
عذبوا أخواننا
وفعلوا كل فاحش ..
يارب أنت أعلم بهم منا
فكن معنا
ولا تتركنا وحدنا
اللهم امين

الخميس، يوليو ١٤، ٢٠٠٥

همسات

للأخوان
السياسه مهلكة بشكل عام... أستعينوا بصديق... ليس عيبا أن نتلقى دروس فى السياسة
حاولوا مرة أخرى
لكفاية
تقدموا...قريبا تنفتح البلورة.. ويخرج النور
للدبلوماسية المصرية
السمسار مهنة ليست رديئة ..... أثمرت فى فلسطين... لكنها مرة فى العراق
للزرقاوى
لا نعرف لماذا قتلت رجلنا المسكين.... هل نحن بلا قيمة لهذه الدرجة.... هل الموت يقيم لديكم بلا رحيل
سعداء بكم جداً.... ميرسى خالص على قتل رجلنا.... ميرسى.....
لوزير خارجيتنا
منصب سفيرنا خالى فى العراق... ما رايك ان تذهب أنت ... وسوف ندعوا ان يطلب الزرقاوى فيك فدية
لمصر
لماذا لم تملى ما يحدث.... احنا ملينا السكات

الأربعاء، يوليو ١٣، ٢٠٠٥

فعلــوها الصغــار





ليس كلهم أصدقائى لكننى فرحت جداً بالنجاح معهم... كتاب دورى يصدره مجموعة من الشباب... الصغار.. كتاب بسيط وشامل وعميق وساخر و باكى..كتاب يعبر عن الحاره المصرية الصغيرة... كتاب يحمل أقلامهم يعبر عن مكنوناتهم... تجد أفكارهم طريقها للناس... المحاولة تستحق التشجيع والمسانده من الجميع
كل النجاح والتوفيق لحارة زعتر
http://z3tr.loaloaa.com/showthread.php?t=2356

الأحد، يوليو ١٠، ٢٠٠٥

أسامه سرايا...العباسيه

صدمة...الأهرام بين يدى الأقزام....
نافق ثم نافق ثم نافق لا يسلم القلم المنافق من الاذى إن لم تنافق
يعنى الأهرام..... فى أيد هذا
ليس عندى تعليق
لكن
ربنا يفضحهم.... وحسبنا الله ونعم الوكيل

الأحد، يوليو ٠٣، ٢٠٠٥

مصر ليست كذلك

فعلا مصر ليست كذلك .... لن اتوقف عن رواية أحداث و أغوار حكم عبد العاطى لمصر لكننى أحببت ان أشترك فى الحمله التى تهدف لتحسين صورة مصر
هنا
وهنا

السبت، يوليو ٠٢، ٢٠٠٥

الرئيس عبد العاطى فى حوار مفتوح مع الجار الله

فى حوار صريح مع الجار الله رئيس تحرير السياسه الكويتيه فتح سيادة الرئيس عبد العاطى قلبه وقال :
أنا لن أورث الحكم لسوزى بنتى.. سوزى مواطنة مصريه ليها حق الترشح مثل أى مواطن
يعنى هتنزل الانتخابات وهى وحظها ونا عارفه حظها حظ عوالم
الأخوان ليسوا أعدائى أنا كنت أعرف واحد منهم معاى فى الجيش مشكلته انه كان بيستلف كتير
تديهم حريه بجنيه يلهفوا بالف انا خلاص نويت استضفهم عندى فى طره
حماس لازم تفهم ان الوضع الان مختلف عن ايام عرفات وان العقل لازم هو اللى يتحكم
الاولاد بيجتمعوا هنا فى القاهره ياكلوا ويشربوا ويناموا ومبيتفقوش طيب لحد امتى
انا قلت لعرفات سلم وريح دماغنا هو موافقش اهو مات وريحنا واستريح
مره واتنين وتلالته وهو فاكر نفسه عبد الناصر يا عم سلم مش موافق اهو غار
كفايه كلهم امريكان او اخوان اسحاق اخوان وقنديل امريكى انا عارف ايه اللى بيحصل
انامش نايم لا انا مغفل يعنى عامل نايم دلوقتى المنبه يضرب واصحى اديهم بالجذمه

الرئيس عبد العاطى يأمر بتكريم قيادات اكتوبر

فى لفتة وطنية وفى احتفال مهيب كرم السيد الرئيس عبد العاطى قادة وقيادات حرب اكتوبر حيث كان سيادته يفتتح بانورما حرب اكتوبر بمناسبه 25 عاما على الحرب حيث استمع سيادته لأراء الخبراء فى حرب أكتوبر ووصف الخبراء حرب أكتوبر بأنها حرب الدبابات وان سلاح الدبابات هو الذى حسم الحرب وتوج مصر بالنصرز
هذا وقد كرم سيادته الفريق الشاذلى (عند فى السادات ) وكرم الفريق الجمسى والفريق ابو غزاله والفريق محمد حسنى مبارك قائد سلاح الجو اثناء الحرب وقد دار حوار هامسا بينه وبين سيادته حيث طلب من سيادته علاج ابنه الاكبر جمال على نفقة الدوله حيث يعانى جمال من مرض خطير وفى لفتة أنسانيه وقع السيد الرئيس عبد العاطى أمر بعلاج نجل الفريق مبارك فى لندن.
وبعد ذلك توجه سيادته لافتتاح كوبرى عبد العاطى الذى يربط بين مدينة سته اكتوبر والقاهره
وسوف نواليكم بالجديد

الجمعة، يوليو ٠١، ٢٠٠٥

عبد العاطى رئيسا للجمهورية

بتخيل كده لو كان السادات قابل عبد العاطى صائد الدبابات فى أحدى جولاته التفقديه وكتب أسمه فى النوته الشخصيه كما فعل مع الرئيس مبارك
وبتخيل انه جعله نائب وطبعا خالد الاسلامبولى عملها وأصبح عبد العاطى هو الرئيس المووضع كبير انا بكتب الان وان شاء الله هنزل هنا او فى كتاب
هعرض طبعا ان عبد العاطى ادها كمان حرية
والنشيد المعروف بتاع
بالصوبع والسبابه دمر عشرين دبابه
اول ضربة دبابه فتحت علينا الغايه
معلش بقى مليش فى التأليف الغنائى
المهم خلال يومين واكون جاهر بأذن الله ب
عبد العاطى رئيسا للجمهورية
انتظرونى